कार्कीले गरे मुख्यमन्त्रीमा दाबी पेश, ६० सांसदको समर्थन

विराटनगर । नेकपा एमालेका नेता हिक्मतकुमार कार्कीले प्रदेश १ का प्रमुख परशुराम खापुङसमक्ष मुख्यमन्त्रीका लागि दाबी पेश गरेका छन् ।

एमालेका ४०, माओवादी केन्द्रका १३, राप्रपाका ६ र जसपाका १ गरी ६० जना प्रदेश सांसदको समर्थनसहित कार्कीले आइतबार मुख्यमन्त्रीमा नियुक्तिका लागि दाबी पेश गरेका हुन् ।

प्रदेश प्रमुख खापुङले संविधानको दफा १६८ को उपदफा (२) बमोजिम दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभा सदस्यलाई मुख्यमन्त्री नियुक्त गर्नका लागि पुस २४ गते आइतबार बेलुकी ५ बजेभित्र दाबी गर्न समय दिएका थिए ।

त्यसअघि नै कार्कीले दाबी पेश गरेका हुन् । उनलाई प्रदेश प्रमुखले आजै मुख्यमन्त्री नियुक्त गर्ने र भोलि सपथ लिने तयारी छ ।