प्रो क्लब टी–२० : सन्दीपको कप्तानीमा पर्साले उत्तर प्रदेशलाई हरायो

काठमाडौं। नेपाल प्रो क्लब च्याम्पियनसिप टी–२० क्रिकेटमा पर्सा क्लब एक्स आईले उत्तर प्रदेश क्लब एक्स आईलाई पराजित गरेको छ।

वीरगंजस्थित नारायणी क्रिकेट मैदानमा बिहीबार भएको खेलमा पर्साले उत्तर प्रदेशलाई १ विकेटले पराजित गरेको हो।

६७ रनको लक्ष्य पर्साले १६.३ ओभरमा ९ विकेटको क्षतिमा पूरा गर्यो। पर्साका लागि अनिल शाहले १८ र कप्तान सन्दीप लामिछानेले १२ रन बनाए। उत्तर प्रदेशका लागि भने भीम शर्मा, तरुण कुमार, वशी अन्सारीले २–२ तथा शुभम चौधरीले १ विकेट लिए।

पहिले ब्याटिङ गरेको उत्तर प्रदेश १६ ओभरमा ६६ रनमा अलआउट भयो। उत्तर प्रदेशका लागि समिर अन्सारीले २४ रन बनाए। तरुण कुमार र जयदीप सिंहले भने १२–१२ रन जोडे।

पर्साका लागि भने सन्दीप लामिछानेले ३ तथा पवन सराफ, रंजित कुमार, रुपेश सिंहले २–२ तथा सैफुल्लाह अन्सारीले १ विकेट लिए।

अहिले नेपाल पुलिस क्लब र नेपाल आर्मी क्लबबीच प्रतिस्पर्धा भईरहेको छ। प्रतियोगितामा उत्तर प्रदेश, पर्सा, वान्डर्स क्लब नोयडा र ३ विभागीय टोलीको सहभागिता रहेको छ।