भारतसँगको सीमा समस्या सुल्झाउन कुटनीतिक पहल भइरहेको छ : परराष्ट्रमन्त्री साउद

काठमाडौं । परराष्ट्रमन्त्री नारायणप्रकाश साउदले नेपाल—भारतबीच रहेको सीमा समस्या समाधानका लागि कुटनीतिक पहल भइरहेको दाबी गरेका छन् ।

भारतको ७५ औं गणतन्त्र दिवसको अवसरमा काठमाडौंमा सोमबार आयोजित कार्यक्रममा मन्त्री साउदले प्रधानमन्त्री पुष्पकमल दाहाल प्रचण्ड भारत भ्रमणमा गएका बेला समकक्षी नरेन्द्र मोदीसँग सीमा समस्याका बारेमा भएको सहमतिअनुसार समाधानका पहल अघि बढाइएको दाबी गरे ।

मन्त्री साउदले सीमानाको समस्या समाधान गर्दा राजनैतिक रुपमा सहमति हुनुपर्ने पनि बताए । उनले प्रशासनिक रुपमा रहेको संयन्त्र क्रियाशील भइ अहिले तथ्यको आधारमा दुवै देशबीच समस्या समाधानका लागि कुटनीतिक पहल चलिरहेको बताए । हालै भारतका विदेशमन्त्री एस जयशंकरको नेपाल भ्रमणका क्रममा पनि सीमा समस्या समाधानको प्रतिवद्धता भएको उनले जनाए ।

उनले भने, ‘सीमानाको समस्या समाधान गर्दा राजनैतिक रुपमा सहमति हुनुपर्छ, हामीसँग प्रशासनिक रुपमा भएको संयन्त्र क्रियाशील भइसकेपछि तथ्यको आधारमा दुई वटै छिमेकीले एक आपसमा कुटनीतिक किसिमले बसेर यो समस्याको समाधान गर्नुपर्छ । यो कुरा दुवै देशको बीचमा सुरु भइसकेको छ ।’