काठमाडौं। टी–२० विश्वकप क्रिकेटको सेमिफाइनलमा दक्षिण अफ्रिकाले अफगानिस्तानलाई ५६ रनमा प्याक गर्यो । बिहीबार भएको खेलमा दक्षिण अफ्रिकाले ५७ रनको लक्ष्य ८.५ ओभरमा १ विकेटको क्षतिमा पूरा गर्यो । यससँगै दक्षिण अफ्रिकाले अफगानिस्तानलाई ९ विकेटले पराजित गर्यो ।
खेल रोमाञ्चक त भयो नै, खेलको आँकडा थप रोमाञ्चक बन्यो । अफगानिस्तान र दक्षिण अफ्रिकाबीचको खेलले धेरै आँकडामा उतारचढाव ल्याएको छ ।
एकदिवसीय होस् वा टी–२० फर्म्याटको विश्वकप, दक्षिण अफ्रिका फाइनलमा पुगेको यो नै पहलो पटक हो । यसअघि दक्षिण अफ्रिका सन् १९९८ मा भएको आईसीसी प्रतियोगिता ‘द नकआउट ट्रफी’को फाइनल पुगेको थियो र उक्त फाइनल दक्षिण अफ्रिकाले जितेको थियो ।
टी–२० विश्वकपमा कुनै पनि टोलीले लगातार ८ खेलमा जित हासिल गरेको यो नै पहिलो पटक हो । विश्वकपमा ८ खेलसम्म अपराजित यात्रा तय गर्न पनि दक्षिण अफ्रिका सफल भएको छ । यसअघि, सन् २०२२ को विश्वकपमा अष्ट्रेलियाले अन्तिम ३ खेल जितेको थियो भने सन् २०२४ मा पनि लगातार ५ खेलमा जित हासिल गरेको थियो । यसअघि सन् २००९ र सन् २०२१ मा दक्षिण अफ्रिकाले नै उत्कृष्ट प्रदर्शन गर्दै लगातार ७ खेलमा जित हासिल गरेको थियो।
यता अफगानिस्तानले भने टी–२० मा सबैभन्दा कम रन बनायो । सन् २०१४ मा टी–२० विश्व कपमा बंगलादेशविरुद्ध अफगानिस्तानले ७२ रन बनाएको थियो । जुन अफगानिस्तानको सबैभन्दा कम स्कोर थियो ।
यस्तै, अन्तर्राष्ट्रिय टी–२० मा दक्षिण अफ्रिकाविरुद्ध कुनै पनि टोलीले बनाएको यो सबैभन्दा कम स्कोर पनि बन्यो । जारी विश्वकपमा न्यूयोर्कमा भएको खेलमा दक्षिण अफ्रिकाविरुद्ध श्रीलंकाले बनाएको ७७ रनको लक्ष्य सबैभन्दा कम स्कोर थियो ।
अब दक्षिण अफ्रिकाविरुद्ध अफगानिस्तान ५६ रनमा अलआउट भएको आँकडा नै विश्वकपको नकआउट चरणमा बनेको सबैभन्दा कम स्कोर बनेको छ । यसअघि, सन् २००९ मा भएको सेमिफाइनलमा वेस्टइन्डिजले बनाएको १०१ रनको लक्ष्य सबैभन्दा कम स्कोर थियो । सन् २०१२ को विश्वकप फाइनलमा लक्ष्य पछ्याउने क्रममा पनि वेस्ट इन्डिजविरुद्ध श्रीलंकाले मात्र १०१ रन बनाएको थियो ।
यस्तै, बिहीबारको खेलमा दक्षिण अफ्रिकाले ६७ बल बाँकी रहँदै अफगानिस्तानलाई हरायो । अन्तर्राष्ट्रिय टी–२० मा दक्षिण अफ्रिकाले अत्यधिक बलको बाँकी रहँदा जितेको यो सबैभन्दा ठूलो जित पनि हो । यसअघि सन् २००७ मा पाकिस्तानविरुद्ध १३० रनको लक्ष्य पछ्याउने क्रममा दक्षिण अफ्रिकाले ५१ रन बाँकी रहँदा नै लक्ष्य पूरा गर्न सफल भएको थियो ।
अफगानिस्तानका फजलहक फारुकीले जारी विश्वकपमा १७ विकेट लिए । कुनै पनि बलरले एकै संस्करणमा लिएको यो सबैभन्दा धेरै विकेट पनि हो । जसमध्ये १० विकेट फारुकीले पावर प्लेमा लिएका थिए । सन् २०२१ को विश्वकपमा वानिन्दु हसरंगाले १६ विकेट लिएका थिए ।
यस्तै, अन्तर्राष्ट्रिय क्रिकेटमा अफगानिस्तानविरुद्ध दक्षिण अफ्रिकाले लगातार ५ खेलमा जित हासिल गरेको हो । यसअघि दुवै टोली विश्वकपमा नै आमने सामने भएका थिए । जसमध्ये अफगानिस्तान र दक्षिण अफ्रिकाले सन् २०१० र २०१६ को विश्वकप तथा सन् २०१९ र सन् २०२३ को एकदिवसीय क्रिकेटमा प्रतिस्पर्धा गरेका थिए।
Facebook Comment
Comment