त्यो असार १५, धान दिवस मनाउन गएका तत्कालीन कृषि मन्त्रीले राजीनामा दिनुपरेको घटना

काठमाडौं। देशभर रोपाइँको चटारो चलिरहेको बेला ९ वर्षअघि आजकै दिन (असार १५) गतेको एक घटनाका कारण तत्कालीन कृषिमन्त्रीले राजीनामा दिनुपरेको थियो ।

१५ असार २०७२ मंगलबारको दिन तत्कालीन कृषिमन्त्री हरि पराजुलीले अशोभनीय व्यवहार देखाएपछि पदबाट हट्नु परेको थियो ।

त्यसपछिका प्राय १५ असारमा सो घटनाको चर्चा हुनेगर्छ। असार १५ को अवसर पारेर मन्त्रीदेखि कलाकारसम्म खेतमा धान दिवसको रमाइलोमा जुटेका थिए । काठमाडौंको मुलपानीमा पुगेका कृषिमन्त्री हरि पराजुलीले भने खेतमै रमिता देखाए ।

उनले आफ्नो जिउमा लागेको हिलो पुछ्न महिलाकै फरियाको सहायता लिए । रमाइलो गर्ने बहाना मन्त्री जस्तो गरिमामय पदको पदीय मर्यादालाई नै लत्त्याएर रोपाहार महिलालाई अँगालो नै हाले ।

मन्त्रीको अशोभनीय कार्यबाट महिलाहरू भागीरहेको थिए । तर, मन्त्री भने पुनः उही शैलीमा लम्किरहेका थिए । तर, पछिपछि लाग्दै मन्त्रीले महिलालाई गर्ल्याम्म अँगालो हाले । मन्त्रीले एकपछि अर्को गर्दै रोपाहार अन्य केही महिलासँग पनि यस्तै दुर्व्यवहार गरे ।

घटनाको भिडिओ साँझ सामाजिक सञ्जालमा भाइरल भयो । टेलिभिजनहरूले प्रशारण गरेपछि राजीनामाको दबाब बढ्यो । सुशील कोइराला नेतृत्वको सरकारका एमालेबाट सहभागी मन्त्री पराजुलीमाथि उनकै पार्टीबाट समेत राजीनामाको दबाब बढ्यो । अनन्त उनले पद छाड्नु परेको थियो ।