ठूला दलले रास्वपा नेतृत्वलाई बारम्बार टार्गेट गरे : स्वर्णिम वाग्ले

काठमाडौं ।राष्ट्रिय स्वतन्त्र पार्टी (रास्वपा)का उपसभापति स्वर्णिम वाग्लेले पार्टीका सभापति रवि लामिछानेलाई ठूला दलहरूले निशाना बनाएको बताएका छन् ।

चितवनमा जनयात्रालाई सम्बोधन गर्दै उपसभापति वाग्लेले ठूला दलहरूले डराएर रास्वपा नेतृत्वमाथि निशाना बनाएको बताएका हुन् ।

‘वर्षौं राजनीति गरेका उनीहरूको मत आउने २५/२६ लाख हो। रास्वपाले पाँच महिनामै ११/१२ लाख मत ल्यायो। भोलि रास्वपाले बढाएर १७/१८ लाख पुर्‍याउला र उनीहरूको घटेर १६/१७ लाखमा आउला भन्ने डर छ,’ उनले भने,’ठूला दलहरूले रास्वपाको नेतृत्वलाई पटक-पटक टार्गेट गरिरहे ।

सरकारले बदला लिने नियतले आफ्नो पार्टीका सभापति लामिछानेलाई पक्राउ गरिएको उनले  बताएका छन्। उपसभापति वाग्लेले सेखी झार्ने र बदला लिने नियतले नै लामिछानेलाई रातारात बेडरूमबाट पक्राउ गरिएको बताए ।’यसअघि हिरासतमा राख्दा पनि यस्तै गरिएको थियो। त्यसैलाई पुनरावृत्ति गर्न खोजिएको छ,’ उनले भने।

अदालतको आदेशपछि जानकारहरूसँग कुरा गर्दा उच्च अदालतले जिल्ला अदालतलाई जानकारी गराउने र त्यसपछि प्रहरी हुँदै प्रक्रियामा जाने जानकारी पाएपनि रातरात पक्राउ गरिएको उनको भनाइ छ । ‘त्यसो हुँदा सोमबारसम्म समय हुने र तारेख बुझ्न जाँदा सभापति लामिछानेले आफै जानकारी गराउन सक्ने भनिएको थियो। तर उल्टो भयो,’ उनले भने।

पक्राउबाट लामिछाने हतास नभएको वाग्लेको भनाइ छ । वाग्लेले रणनीति बनाएर गए ०८४ मा ती दलहरूलाई पत्तासाफ गर्न सकिने बताए।