मकवानपुरको बकैयामा बस दुर्घटना, ३१ जना घाइते

मकवानपुर । मकवानपुरको बकैयामा यात्रुवाहक बस दुर्घटना हुँदा ३१ जना घाइते भएका छन् ।

बकैया गाउँपालिका वडा नम्बर–३ चिसापानी बजारस्थित धरान–चतरा सडक खण्डमा बस अनियन्त्रित भएर पल्टिएको जिल्ला प्रहरी कार्यालयले जनाएको छ ।

सिन्धुलीबाट हेटौँडातर्फ आउँदै गरेको बाप्र ०६–००१ ख ०२७० नम्बरको बसमा भीमफेदी गाउँपालिका कृषि तथा पशु शाखाबाट अगुवा कृषक भ्रमणमा रहेका कृषक र प्राविधिक रहेको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक श्यामु अर्यालले जानकारी दिए ।

भ्रमण सकेर फर्किँदै गरेको अवस्थामा बुधबार राति ९ः३० बजेको समयमा घुम्तीमा दुर्घटना भएको उनले बताए । बसमा चालकसहित ३१ जना सवार थिए । सबैजना घाइते भएका छन् ।

दुर्घटनामा मकवानपुर भीमफेदी–३ बुल्मिङ बस्ने वर्ष ४६ का श्रीराम बज्यु, भीमफेदी–५ ज्यामिरे बस्ने वर्ष ५५ की रीताकुमारी मगर, चितवन राप्ती–२ गडौली बस्ने वर्ष २९ का पशुचिकित्शक डा. सरोज ओझा र उनकी श्रीमती वर्ष २७ की रेश्मा सुवेदी घाइते भएका छन् ।

यस्तै भीमफेदी–६ टारगाँउ बस्ने भीमफेदी गाउँपालिकाकी कार्यपालिका सदस्य वर्ष ४५ की सुमित्रा लामा, सोही स्थान बस्ने वर्ष ५५ की श्रीसानी आले, भीमफेदी–५ अकोटे बस्ने वर्ष २५ का अनिल स्याङ्बो पनि घाइते भएका छन् । उनीहरूलाई थप उपचारका लागि भरतपुर पठाइएको प्रवक्ता अर्यालले बताए ।

यसैगरी दुर्घटनामा घाइते भएका मकवानपुर भीमफेदी–२ निगाले बस्ने वर्ष ४५ का दिलिपराज बुलन, भीमफेदी–५ सुपिङ बस्ने वर्ष ५१ को यदुनाथ पुडासैनी, मकवानपुरगढी–३ मक्रान्चुली बस्ने वर्ष ४२ का नारायणप्रसाद शर्मा र हेटौँडा–११ थानाभन्ज्याङ बस्ने वर्ष २९ का उज्वल राना मगरलाई उपचार पश्चात् डिस्चार्ज गरिएको प्रवक्ता अर्यालले बताए ।

त्यसैगरी दुर्घटनामा भीमफेदी–६ भदौरे बस्ने वर्ष ३२ का सुदीप पराजुली, भीमफेदी–२ चौकीडाँडा बस्ने वर्ष २७ का सुयास पाख्रिन, भीमफेदी–९ झिरघारी बस्ने वर्ष २७ का सुभाष रुम्बा, सोही स्थान बस्ने वर्ष ५२ का हितचन्द्र मोक्तान, भीमफेदी–२ का वडाध्यक्ष वर्ष ४९ का कासीराम बज्युको हेटौंडास्थित मकवानपुर सहकारी अस्पतालमा उपचार भइरहेको छ ।

दुर्घटनामा परेर घाइते भएका हेटौंडा–१८ बस्ने वर्ष २५ का रुबिन घर्ती, भीमफेदी–३ बस्ने वर्ष ५३ का बुद्विसिंह दोङ, भीमफेदी–८ बस्ने वर्ष ३९ की सीता थिङ, सोही स्थान बस्ने वर्ष ३५ की सूर्यमाया घलान, भीमफदी–१ बस्ने वर्ष ५० का करणध्वज पाख्रिन, हेटौँडा–१८ हर्नामाडी बस्ने वर्ष २९ का विमल ढुङ्गाना, भीमफेदी–४ चिउरी बगैँचा बस्ने वर्ष ४० को कृष्णहरि गाहा मगर, भीमफेदी–७ मान्डु बस्ने अन्दाजी ३८ वर्षका सुजन प्रजा, भीमफेदी–८ गँगटे बस्ने वर्ष ४३ का मानबहादुर लामा, भीमफेदी–१ सानुटार बस्ने वर्ष ४२ का राजेन्द्रकुमार स्याङतान, भीमफेदी गाँउपालिकाको कृषि प्राविधिक वर्ष २९ का सानु कान्छा घिसिङ, भीमफेदी गाँउपालिकाका पशु प्राविधिक वर्ष ३१ काम पुष्पलाल बज्यु, भीमफेदी–३ बस्ने वर्ष ४८ का अर्जुन तामाङ, बसका सहचालक उदयपुर रौतामाई–५ बस्ने वर्ष ३२ का सतिह दाहाल उपचारपछि डिस्चार्ज गरिएको प्रवक्ता अर्यालले बताए ।

बसका सहचालक दाहाल प्रहरीको नियन्त्रणमा रहेका छन् भने चालक फरार रहेका छन् । फरार रहेका चालकको खोजी भइरहेको प्रवक्ता अर्यालले बताए ।