चीनले केही अमेरिकी कर्मचारीलाई भिसा प्रतिबन्ध लगायो

काठमाडौं । चीनले केही अमेरिकी कर्मचारीमाथि भिसा प्रतिबन्ध लगाउने घोषणा गरेको छ ।

तिब्बतसम्बन्धी विषयमा अनुचित व्यवहार गर्ने केही अमेरिकी कर्मचारीहरूलाई भिसा प्रतिबन्ध लगाउने घोषणा गरेको चीनको विदेश मन्त्रालयले जनाएको छ ।

तिब्बती क्षेत्रमा विदेशीको पहुँचलाई नियन्त्रण गर्ने नीतिमा संलग्न चिनियाँ अधिकारीमाथि दुई हप्ता अघि वासिङ्टनले थप भिसा प्रतिबन्ध लगाएको थियो । त्यसपछि नियमित पत्रकार सम्मेलनमार्फत चीनले यो घोषणा गरेको हो ।

अमेरिकाले चिनियाँ कम्युनिष्ट पार्टीले अमेरिकी कूटनीतिज्ञ, पत्रकार र अरू अन्तर्राष्ट्रिय पर्यवेक्षकलाई तिब्बत र त्यहाँका अरू क्षेत्रमा पहुँच दिन अस्वीकार गरेको आरोप लगाएको छ । अमेरिकी कूटनीतिज्ञ र अरू व्यक्तिलाई उक्त क्षेत्रमा निर्बाध पहुँच दिन पनि माग गरेको छ ।

चिनियाँ विदेश मन्त्रालयका प्रवक्ता लिन जियानले तिब्बतसम्बन्धी विषय आन्तरिक मामला भएको बताए । उनले अमेरिकाले तिब्बतका विषयमा चिनियाँ अधिकारीविरुद्ध भिसा प्रतिबन्ध लगाएको र उक्त निर्णयले अन्तर्राष्ट्रिय कानुन र सम्बन्धको मूल नियमको गम्भीर उल्लङ्घन गरेको उल्लेख गरे ।

“विदेशी पर्यटकहरूलाई तिब्बतको सुदूर पश्चिमी क्षेत्र भ्रमण गर्न अनुमति दिइन्छ यदि उनीहरूले समूहमा यात्रा गर्छन् र पहिले नै अनुमतिपत्र प्राप्त गर्छन् । कूटनीतिज्ञ र विदेशी पत्रकारहरूले त्यहाँ जान तिब्बतका स्थानीय अधिकारीहरूको स्वीकृति लिनु पर्छ । तिब्बत खुला छ । चीनले अन्य देशका मैत्रीपूर्ण मानिसहरूलाई तिब्बत भ्रमण गर्न, यात्रा गर्न र व्यापार गर्न स्वागत गर्दछ,” लिनले पत्रकारहरूलाई भने ।

“तर, चीनले तथाकथित मानव अधिकार, धर्म र संस्कृतिको बहानामा तिब्बती मामिलामा कुनै पनि देश वा व्यक्तिको हस्तक्षेपको विरोध गर्दछ,” उनले थपे ।