दुर्गा प्रसाईंलाई म्याद लिएर काठमाडौं परिसरमा फर्काइयो (तस्वीरहरू)

काठमाडौं । तीनकुनेमा चैत १५ गते भएको हिंसात्मक प्रदर्शनका ‘कमान्डर’ दुर्गा प्रसाईंलाई १२ दिन हिरासतमा राख्न अदालतले अनुमति दिएको छ ।

जिल्ला अदालत काठमाडौंका न्यायाधीश शिशिरराज ढकालको इजलासले प्रसाईंलाई १२ दिन हिरासतमा राख्न अनुमति दिएको हो ।

प्रसाईंलाई प्रहरीले कम्तीमा १२ दिन हिरासतमा राखेर अनुसन्धान गर्नका लागि माग गरेको थियो । सोहीअनुसार ढकालको इजलासले म्याद थपको अनुमति दिएको हो ।

म्याद थपपछि प्रसाईंलाई भद्रकालीस्थित जिल्ला प्रहरी परिसर काठमाडौं लगिएको छ, जहाँ राप्रपाका वरिष्ठ उपाध्यक्ष रवीन्द्र मिश्र र सांसद एवं महामन्त्री धवलशमशेर राणालाई पनि हिरासतमा राखिएको छ ।

प्रसाईंलाई आज (शुक्रबार) झापाको भद्रपुर विमानस्थल हुँदै बुद्ध एअरको जहाजबाट काठमाडौं ल्याइएको हो । विमानस्थलबाट लगेर भद्रकालीस्थित जिल्ला प्रहरी परिसर काठमाडौंमा उनलाई राखिएको थियो । त्यहाँबाट सरकारी वकिलको कार्यालयमा लगेर बयान लिएपछि प्रसाईंलाई अदालत लगिएको थियो ।

प्रसाईं यही चैत १५ गते तीनकुनेको प्रदर्शनस्थलबाट फरार भएका थिए । उनले बिहीबार भारतको आसाम प्रहरीसँग आत्मसमर्पण गरेका थिए । भारतीय प्रहरीले उनलाई काँकडभिट्टा ल्याएर नेपाल प्रहरीलाई बुझाएको थियो ।

तस्वीर –